Po përgatitem për lindjen – Si t’i njoh shenjat e lindjes?
Javët e fundit të shtatzënisë janë të mbushura me emocione, pritje dhe shumë pyetje. Një nga shqetësimet më të zakonshme të nënave është: “Si do ta kuptoj që ka filluar lindja?”
Edhe pse çdo lindje është unike, ekzistojnë disa shenja të zakonshme që tregojnë se trupi po përgatitet për ardhjen e bebit.
1. Zbritja e bebit në legen
Disa ditë ose javë para lindjes, bebi mund të zbresë më poshtë në legen. Kjo mund të sjellë:
• Frymëmarrje më të lehtë.
• Shtim të presionit në pjesën e poshtme të barkut dhe legenit.
• Nevojë më të shpeshtë për urinim.
Jo të gjitha gratë e përjetojnë këtë në të njëjtën mënyrë.
2. Dalja e tapës mukoze
Tapa mukoze është një grumbull sekrecionesh që mbron qafën e mitrës gjatë shtatzënisë. Me afrimin e lindjes, ajo mund të dalë pjesërisht ose plotësisht.
Ajo mund të jetë:
• E tejdukshme.
• Rozë.
• Me pak gjurmë gjaku.
Dalja e saj nuk do të thotë domosdoshmërisht që lindja do të fillojë menjëherë, por është një shenjë se trupi po përgatitet për lindje në 24-48-72 orët e ardhshme.
3. Kontraksionet e vërteta
Shenja më e rëndësishme e fillimit të lindjes janë kontraksionet e rregullta. 1 kontraksion çdo 5 min për të paktën 1 orë rrjesht.
Kontraksionet e lindjes:
• Bëhen gradualisht më të forta.
• Vijnë në intervale të rregullta.
• Zgjasin më shumë me kalimin e kohës.
• Nuk qetësohen me pushim ose ndryshim pozicioni.
Nëse kontraksionet bëhen të shpeshta dhe të rregullta, kontaktoni maminë ose maternitetin.
4. Çarja e ujërave
Lëngu amniotik mund të rrjedhë si një sasi e madhe uji ose si një rrjedhje e vazhdueshme e vogël.
Nëse mendoni se ju kanë plasur ujërat:
• Vëzhgoni ngjyrën e lëngut.
• Vendosni një pecetë higjienike të pastër.
• Kontaktoni mjekun ose maternitetin për udhëzime.
Nëse lëngu ka ngjyrë jeshile, kafe ose ka erë të pazakontë, duhet të kërkoni ndihmë mjekësore menjëherë.
5. Shenja që kërkojnë vlerësim urgjent
Kontaktoni menjëherë mjekun ose urgjencën nëse keni:
• Gjakderdhje të bollshme vaginale.
• Ulje ose mungesë të lëvizjeve të bebit.
• Dhimbje të forta dhe të vazhdueshme.
• Temperaturë të lartë.
• Dhimbje koke të forta, turbullim të shikimit ose ënjtje të papritur të fytyrës dhe duarve.
• Çarje të ujërave me lëng të ngjyrosur ose me erë të rëndë.
Çfarë duhet të keni gati?
Në javët e fundit është mirë të përgatitni çantën e maternitetit me:
• Dokumentet personale dhe kartelën e shtatzënisë.
• Rroba për nënën dhe bebin.
• Produkte higjienike.
• Pelena dhe veshjet e para të bebit.
• Karikues telefoni dhe sendet personale të nevojshme.
Mos harroni…
Jo çdo dhimbje është shenjë e lindjes dhe jo çdo lindje fillon në të njëjtën mënyrë. Besoni trupit tuaj, monitoroni lëvizjet e bebit dhe mos hezitoni të kërkoni këshillë profesionale nëse keni pasiguri.
Përgatitja për lindjen nuk do të thotë vetëm të bëni gati çantën e maternitetit, por edhe të ndiheni të informuara dhe të sigurta. Njohja e shenjave të lindjes ju ndihmon ta përjetoni këtë moment me më shumë qetësi dhe besim.
Çdo lindje është fillimi i një historie të re dhe të veçantë.
